Luseovervakinga er i gang

Metodane som vert brukte er dei same frå år til år, men områda som blir overvaka vert justerte ut frå ny kunnskap.

– Nytt i år er at vi har endra litt på området som vi skal undersøke utanfor Trondheimsfjorden. Tidlegare har vi tråla i fire veker nærare kysten og i fjordane i dette området. No skal vi tråle i ein lengre periode, og også i dei ytre delane av dette området, fortel Rune Nilsen som er prosjektleiar for det omfattande feltarbeidet som vert gjort i den nasjonale lakseovervakinga (NALO).

Målet med å flytte trålinga lenger ut av fjorden er å fange laksen etter at den har passert dei kystnære områda med mest lakselus.

– Dette vil gje eit meir korrekt bilde av situasjonen. Samtidig strekker vi trålinga ut i tid for å vere sikre på å få med både tidleg og seint utvandrande smolt, seier Nilsen.

Fokus på vill laksesmolt

No i starten av overvakinga er det laksesmolten som skal symje frå elvene til beiteområda i havet som er i fokus:

– Målet er at overvakinga skal vere i gang når laksesmolten sym ut frå elvene, slik at vi kan undersøke om dei får mykje lakselus på seg før dei kjem ut i havet, seier Nilsen.

Men også andre artar er i fokus:

– Vi brukar overvakinga til å kartlegge om lakselus har negativ effekt på overlevelsen til både villaks, sjøaure og sjørøye.

• Her kan du lese om korleis arbeidet blir gjort.

Dekker heile kysten

Overvakinga dekker heile kysten frå Sørlandet til Finnmark, men startar seinare i nord.

– Smoltutvandringa starter tidlegare i sør enn i nord. Derfor har vi tilpassa oppstarten i dei ulike landsdelane til det. Overvakinga pågår fram til starten av august, seier Nilsen.

Foreløpige resultat frå overvakinga blir presentert i juni, og endeleg rapport kjem i løpet av hausten.

Viktig kunnskap til trafikklyssystemet

Resultata frå overvakinga av lakselus er ein viktig del av kunnskapen som blir brukt i trafikklyssystemet, som er styresmaktene sitt verktøy for å regulere produksjonen av oppdrettslaks.

– Resultata frå årets overvaking vil inngå i materialet som blir nytta neste gong vi skal gje råd i samband med dette systemet, avsluttar Rune Nilsen.

Overvakinga blir gjort på oppdrag frå Mattilsynet og Nærings- og fiskeridepartementet.