Gå til hovedinnhold

Her møter du HI i havveka


Bilde fra et arragement. På scenen sitter tre paneldeltagere på hver sin stol. Ordstyrer står

Her frå eit arrangement på fjorårets One Ocean Week.

Fotograf: Christine Fagerbakke / HI

One Ocean Week går av stabelen komande veke, og HI er hjarteleg til stades på fleire arrangement. I år blir det mest om desse F-ane: fisk, fôr, forsking og film.

Norskare fôr til oppdrettsfisken

Ein slakteklar laks et ca. 30 gram med fôr om dagen, og det vert til 2 millionar tonn fôr i året. I dag består ein pellet av åtte prosent norske ingrediensar og 92 prosent importerte. Regjeringa har sett som mål å auke norskandelen i fiskefôr til 25 prosent. Det tilsvarar ei auke på over 300 000 tonn ingrediensar.  

Havforskingsinstituttet inviterer til diskusjonen om korleis vi skal klara dette. Frå regjeringa stiller statssekretær Even Tronstad Sagebakken.

Tid: måndag 7. april kl. 15.30-16.45  
Stad: Havrommet på Skoltegrunnskaien  

Her finn du meir informasjon om arrangementet.

Sjå Nordsjøen med andre auge 

«Alle» kjenner Nordsjøen, eller? Filmen North Sea – Nature Untamed gir eit innblikk i den ville Nordsjø-naturen. Ein kortversjon av filmen dannar utgangspunkt for ein viktig berekraftdiskusjon i Vestlandssalen. HI-forskar Johanna Myrseth Aarflot skal snakka om samla menneskeleg påverknad i travle havområde som Nordsjøen. Eit panel tek diskusjonen vidare. Seansen vert leia av Hilde Holdhus frå Sarsia.

Merk at dette arrangementet skjer på engelsk og har påmelding.

Tid: onsdag 9. april kl. 15.30-18.00
Stad: Vestlandssalen i Vestalandshuset; Lars Hilles gate 22

Her kan du melde deg på.

Fiskebestandane før og no: Frå nostalgisk kystkultur til dagens realitetar

Er du glad i film, fisk og forsking? Då er dette arrangementet for deg.

Vi varmar opp med eit utdrag frå «Havfolket – en kjærlighetserklæring til kystfolket». Produsent og regissør Elisabeth Kleppe fortel om jakta på filmklipp og kva dei kan læra oss om den gamle kystkulturen vår. Etter ein kort pause er vi tilbake i 2025 og spør: Var det meir fisk i havet før – eller levde vi berre lykkeleg uvitande? Målet er å bli litt klokare på korleis det eigentleg står til med dei viktigaste fiskebestandane. Dei som skal opplysa oss er forskingsdirektør Geir Huse frå HI, UiB-professor Katja Enberg og fiskereiar Kristian Sandtorv, som også leiar Pelagisk forening. Mangeårig fiskeriblad-journalist Kjersti Sandtorv leiar panelsamtalen.

Tid: torsdag 10. april 14:15-16:00
Stad: Storsalen, Nygårdsgaten 5

Her finn du meir informasjon om arrangementet.