Gå til hovedinnhold
Havforskningsinstituttet HI Åpne/Lukke hovedmeny
English <- Tilbake

Sjå sjøsettinga: Her kjem «Frida»

To kranbiler står på en kai, der de heiser en usv ned i fjorden.

To heisekraner måtte til for å få "Frida" frå kaikanten til fjorden. 

Fotograf: Erlend Astad Lorentzen / Havforskingsinstituttet

Denne veka vart Havforskingsinstituttet sin nye USV sjøsett i Bergen.

Publisert: 31.01.2025 Forfatter: Bente Kjøllesdal

Den umanna overflatefarkosten «Frida» er komen til havbyen.  

Ho er ein av dei to USV-ane Havforskingsinstituttet bestilte frå Kongsberg tilbake i 2021, og som vi har utvikla saman med bedrifta. 

– Det er kjekt at «Frida» omsider er komen på plass, slik at vi kan setje ho i arbeid, seier Brede Fedje Andersen, medan han dreg i ei stropp her og ei stropp der for å manøvrere farkosten trygt frå lasteplanet til Byfjorden. 

Han arbeider i fartøyinstrument-seksjonen, og er ansvarleg for USV-ane til HI. 

Vår første USV «Frigg» vart levert i august i fjor. Han var i full sving allereie eit par veker etter ankomst, i det banebrytande brislingtoktet.

Meir data – meir effektivt

«Frida» og «Frigg» er begge del av framtidas havforsking – der digitalisering, droner og ny teknologi er viktige verktøy.

– Desse to Sounderane opnar for at vi kan samle akustiske data uhyre effektivt, seier forskingssjef Espen Johnsen.

Han leier også arbeidspakken i det strategiske endringsprosjektet NEMO som tek føre seg korleis vi kan bruke USV til å mengdemåle fiskebestandar.

– Brislingtoktet gav grunn for optimisme. For å byggje vidare på dette og ta dei neste stega, er det avgjerande at det gode samarbeidet mellom forskingssida, HI digital og rederi held fram, seier han.

«Frida» får ein tilsynelatande mjuk start på karrieren hos havforskinga, og får dyppa skroget i Byfjorden nokre dagar. Hennar første oppdrag vert truleg på tokt i nord i slutten av mars.

En mann sitter på dekk til USV. Han slår ut med armene og smiler

USV-ansvarleg Brede Fedje Andersen er storfornøgd med at "Frida" endeleg har fått vatn under baugen.

Fotograf: Erlend Astad Lorentzen / HI
To USVer side om side langs kaikanten ved Nykirkekaien i Bergen

"Frida" og "Frigg" side om side i Bergen – for første gong. Medan "Frida" snart skal ta fatt på sine første oppdrag, vart "Frigg" med tilbake til Horten for å få dei nyaste oppdateringane.

Fotograf: Erlend Astad Lorentzen / HI
En mann som sitter på kaikanten gir et tau til en annen mann, som står på dekk av usv

Joakim Skjefstad (t.v.) og Brede Fedje Andersen losnar "Frigg" frå kaikanten.

Fotograf: Erlend Astad Lorentzen / HI
Nærbilde at undersida av USV. Farkosten har ein gondol som stikker djupt i vatnet, og undersida av denne er dekt av ekkolodd

Då "Frida" vart heisa frå lasteplanet til fjorden, var det mogeleg å få sjå hennar største styrke på nært hand: ekkolodda. 

Fotograf: Erlend Astad Lorentzen / HI
To hender lager eit hjarte framfor USVen

Entusiasmen var stor, då "Frida" begynte på siste ankomst-etappe: ferda frå lasteplanet til fjorden. 

Fotograf: Bente Kjøllesdal / HI

Fem ferdigheiter frå «Frida»: 

  • Ho bistår i bestandsestimering av fisk med innsamling av akustiske data frå ekkolodd og kartlegg botntopografi med multistråleekkolodd
  • Kartlegger straumforhold med ADCP
  • Samlar konduktivitet- og temperaturdata i vass-søyla og konduktivitet-, fluorescens- og temperaturdata frå overflata
  • Innhentar data i opptil to veker på eiga hand, uavhengig av avstand frå kontrollsenteret
  • Ta opp film, bilete og vêrdata frå områda som vert undersøkte

Dette skil seg ikkje så mykje frå dei større båtane våre, men: 

– Den store forskjellen er at vi gjer det fjernstyrt og i ei ganske liten «innpakning» med dei fordelane det også kan ha når det kjem til ting som miljøpåverknad, støy, utslepp og redusert skremmeeffekt på fisk, forklarar Andersen.